lms

दाङ । देउखुरीको राप्ती गाउँपालिका–८ का वडा अध्यक्ष चन्द्रबहादुर गुरुङ १ वर्ष पछि विदेशबाट फर्केर जिम्मेवारी सम्हालेका छन् ।

पारिवारीक समस्याका कारण गत वर्षको साउन २० गते बेलायत गएका वडा अध्यक्ष गुरुङ वडाबासीकै मायाले एक बर्षमै स्वदेश फर्किएका हुन् । वडा अध्यक्ष गुरूङ विदेशबाट फर्किए लगत्तै जिम्मेवारी सम्हालेका छन् । उनी १ हप्ता अघि गृह जिल्ला दाङ आइपुगेका थिए ।

उनी विदेश जानू अघि वडा सदस्य चम्फा पुनलाई कार्यवहाक दिएर गएका थिए । यता राप्ती गाउँपालिका गाउँकार्यपालिकामा अनुमति नलिएर विदेश जाने र पुनः आएर पद सम्हाल्ने कुराको कार्यपालिका सदस्यहरुले विरोध जनाएका छन् । वडा अध्यक्ष गुरूङ भदौ १३ गते बसेको कार्यपालिका बैठकमा आएपछि कार्यपालिका भित्र विरोध सुरू भयो भने कार्यपालिका बैठक समेत चल्न सकेन् ।

गुरुङ बैठकमा सहभागी भएपछि उनलाई कुरा राख्न दिईएको थियो । तर, उनको कुरा चित्त बुझ्दो नभएपछि प्रबक्ता तथा वडा नं. २ का अध्यक्ष पहलवान चौधरी, वडा–४ का वडा अध्यक्ष वीरबहादुर चौधरी, वडा–६ का वडा अध्यक्ष दीपक कुमार चौधरी र कार्यपालिका सदस्य रण बहादुर पुजालीले लिखित रूपमै विरोध जनाए । उनीहरूले नो अफ डिसेन्ट लेखेर बैठकबाट बाहिरिए । प्रबक्ता चौधरीका अनुसार वडा अध्यक्ष गुरुङ अब विदेश नजाने र बाँकी कार्यकाल वडाध्यक्षका रुपमा काम गर्ने भनि प्रतिबद्धता जनाएकाे बताए । तर, त्यसरी मनलाग्दी तरिकाले जाने कुरा जनमत माथि अपमान भएको उनको भनाई छ ।

त्यस्तै गुरुङलाई कार्यपालिका बैठकमा समेत नबोलाउँदा पनि आफै आएको प्रबक्ता चौधरीको भनाई छ । गाउँपालिकाका अध्यक्ष प्रकाश बिष्टले वडाध्यक्ष गुरुङलाई हाजिर गराउने वा नगर्ने विषयमा कानुनी परामर्श लिएर मात्रै निर्णय हुने बताए । गुरुङ एमालेबाट निर्वाचित वडा अध्यक्ष हुन् । २०७९ को चुनाबमा उनी विजयी भएका थिए । उनी निर्वाचित हुनुभन्दा पहिले सोही वडाको कार्यालय सहयोगीको रुपमा कार्यरत रहेका थिए ।