काठमाडौं । रसुवाको भोटेकोशीमा बुधबार आएको बाढीपछि बेपत्ता नागरिकको खोजी तथा शव व्यवस्थापनको लागि नेपाली सेनाले खोज तथा उद्धारको कार्य तीव्र बनाएको छ ।

शव संकलन तथा बेपत्ताको खोजीमा ढिलाइ भएको भन्दै गुनासो आएको भन्दै सेनाले विशेष टोली परिचालन गरी नदी तथा तटीय क्षेत्रमा धमाधम खोजी र शव संकलन गरिरहेको जनाएको छ । बाढीले तल्लो तटीय क्षेत्रसम्म बगाएर ल्याएका शवको खोजी तथा संकलनका लागि रसुवादेखि चितवन सम्मको नदी तटीय क्षेत्रमा आज थप १ हजार २ सय सैनिक परिचालन गरिएको छ ।

त्यस्तै,सेनाले बाढी प्रभावित क्षेत्रको साथै त्रिशूली र नारायणी नदी किनारका स्थानमा टोलीगत रुपमा सैनिक खटाएर शव खोजी तथा संकलनलाई उच्च प्राथमिकता दिएको छ । साथै प्रभावित नागरिकको उद्धार,राहत वितरण तथा अस्थायी व्यवस्थापनका लागि नेपाली सेनाका १ हजार ६ सय जनशक्ति परिचालन गरिएको थियो ।

यस्तै,आज थप १ हजार २ सय सैनिक परिचालन भएसँगै भोटेकोशी बाढी प्रभावित क्षेत्र तथा तल्लो तटीय इलाकामा उद्धार,राहत र शव संकलनका लागि परिचालित नेपाली सेनाको कुल जनशक्ति २ हजार ८ सय पुगेको छ ।