काठमाडौं । सर्वोच्च अदालतले पत्रकार किशोर श्रेष्ठलाई रिहा गर्न आदेश दिएको छ । सर्वोच्च अदालतका न्यायाधीशद्वय नहकुल सुबेदी र बाबुराम ढकालको इजलासले पत्रकार श्रेष्ठलाई हिरासतबाहिरै राखेर अनुसन्धान गर्न भन्दै सोमबार आदेश दिएको हो ।

श्रेष्ठलाई गैरकानूनीरुपमा गिरफ्तार गरिएको भन्दै उनकी पत्नी सरस्वती श्रेष्ठले दायर गरेको बन्दी प्रत्यक्षीकरण रिटमा सर्वोच्चले यस्तो आदेश दिएको हो । आदेशमा संविधानको धारा १९ ले सञ्चार सामग्री वा उपकरण जफत वा अवरुद्ध नगर्ने ग्यारेन्टी गरेको सन्दर्भमा,गत साउन २७ र २८ गते श्रेष्ठको घर तथा कार्यालयबाट नियन्त्रणमा लिइएका ६ वटा सिपियु,कम्प्युटर,ल्यापटप,मोबाइल र आइप्याडसहितका सञ्चार सामग्रीहरु सहरजिस्ट्रारको रोहबरमा निवेदक सरस्वती श्रेष्ठलाई फिर्ता दिलाउन पनि भनिएको छ ।

त्यस्तै,श्रेष्ठकी श्रीमती सरस्वती श्रेष्ठले दायर गरेको बन्दीप्रत्यक्षीकरण रिटमा सुनुवाइ गर्दै अदालतले उनलाई थुनामै राखेर अनुसन्धान गर्नुपर्ने अवस्था नदेखिएको ठहर गरेको छ । काठमाडौँ जिल्ला अदालतको अनुमतिमा प्रहरी थुनामा राखिएका श्रेष्ठको हकमा बन्दीप्रत्यक्षीकरणको आदेश जारी नभए तापनि, मुलुकी फौजदारी कार्यविधि संहिता, २०७४ को दफा १५ बमोजिम हाजिर जमानी वा तारिखमा छाडेर अनुसन्धान अघि बढाउन जिल्ला प्रहरी परिसर काठमाडौँका नाममा परमादेश जारी गरिएको छ ।

साथै,संविधानले सञ्चार सामग्री जफत वा अवरुद्ध नगर्ने हक सुनिश्चित गरेको भन्दै श्रेष्ठको घर तथा कार्यालयबाट नियन्त्रणमा लिइएका ६ वटा सीपीयू, कम्प्युटर,मोबाइल, ल्यापटप र आइप्याडसहितका सबै उपकरणहरु उनको श्रीमतीलाई फिर्ता दिलाउन पनि अदालतले आदेश दिएको छ ।