दाङ । नेपाल संस्कृत विश्वविद्यालय बेलझुण्डीमा लागेको ताल्चा दुई महिनापछि खुलेको छ । नेपाल विद्यार्थी सङ्घले उठाएका १४ बुँदे मागमध्ये आधाभन्दा बढी माग सम्बोधन भएपछि नेपाल संस्कृत विश्वविद्यालय केन्द्रीय कार्यालयमा लागेको ताल्चा खुलेको हो ।
सहमतिअनुसार कार्यालयको मूलगेट र प्रशासन शाखा लगायतका ठाउँका ताल्चा खोले पनि उपकुलपति र रजिष्ट्रारको कार्यकक्षको ताल्चा भने यथावत् रहेको नेपाल विद्यार्थी सङ्घले जनाएको छ ।
विद्यार्थीको आउँदै गरेको परीक्षा र कार्यालयको दैनिक प्रशासनिक कार्य सञ्चालनलाई अवरोध नगर्ने उद्देश्यअनुसार दुई महिनादेखि गरिएको तालाबन्दी खोलेको नेपाल विद्यार्थी सङ्घ नेपाल संस्कृत विश्वविद्यालय सङ्घर्ष समितिका संयोजक चोलेन्द्र रिजालले जानकारी दिनुभएको छ ।
मागपत्रको सम्बोधन नभएपछि नेविसङ्घले दोस्रो चरणको आन्दोलन अन्तर्गत गत वैशाख १९ गतेदेखि उपकुलपतिको कार्यालयमा अनिश्चितकालीन तालाबन्दी गरेको थियो ।